ޒަމާނީ ކުލާސްރޫމް ޓެކްނޮލަޖީތައް

ލިޔުނީ: އަކުރަމް ސަޢުދު 

މިޒަމާނުގައި ޓެކްނޮލޮޖީއަށް އައި ކުރިއެރުމުގެ ސަބަބުން ޒަމާނުންސުރެ އަޅުގަނޑުމެން އުނގެނެމުން އައި ގޮތް ބަދަލުކޮށްލުމުގެ ބާރު ޓެކްނޮލަޖީއަށް ވަނީ ލިބިފައެވެ. މިކަމަކީ ދެމީހަކު ދެބަސްވާނެ ކަމެއްނޫނެވެ. މިލިޔުމުގައި ކުލާސްރޫމްގައި ބޭނުންކުރެވޭ ޒަމާނީ ޓެކްނޮލޮޖީގެ އާލާތްތަކުގެ ތެރއިން ބޮޑަށް ބަލާލާފައިވާނީ އިލެކްޓްރޯނިކް އާލާތްތަކުގެ މައްޗަށެވެ. މިލިޔުމުގައި ފާހަގަ ކޮށްފައިވާ އާލާތްތަކުގެ އިތުރުންވެސް ޒަމާނީ ޓެކްނޮލޮޖީގެ ވަޞީލަތްތަކާއި އާލާތްތައް މިޒަމާނުގެ ކްލާސް ރޫމްތަކުގައި ބޭނުން ކުރެވެމުން ދެއެވެ. މި ތާގައި މި ބަޔާންކޮށްލަނީ ޒަމާނީ ކުލާސްރޫމްތަކުގައި މިހާރު ބޭނުން ކުރެވެމުންދާ ބައެއް ސާމާނުތަކަށެވެ. މިގޮތުން މައިގަނޑު ގޮތެއްގައި ފާހަގަކޮށްލެވޭ ޓެކްނޮލޮޖީގެ އާލާތްތަކާއި ވަޞީލަތްތައް ދަންނަވައިލާނަމެވެ. 

ނެޓްވޯރކް އަދި އިންޓަރނެޓް 

ކުރީ ޒަމާނުގައި ކުލާސްރޫމުގައި މަޢުލޫމާތު ހޯދުމުގައި ބޭނުންކުރެވޭ ވަސީލަތްތަކަކީ ފޮތާއި މުދައްރިސެވެ. ނަމަވެސް މިއަދު މިވަނީ ޙާލަތު ބަދަލުވެފައެވެ. މިހިސާބުން ސުވާލު އުފެދިދާނެއެވެ. މިހާރު އެންމެ ބޮޑަށް މަޢުލޫމާތުލިބޭ ވަސީލަތަކީ ކޮބައިތޯއެވެ؟ ޝައްކެއް ނެތެވެ. އެއީ އިންޓަރނެޓެވެ. އެހެންކަމުން މިއަދު، ކުރިޔާ ޚިލާފަށް މުދައްރިސުގެ ދައުރު ވަނީ ބަދަލުވެފައެވެ. މިހާރު މުދައްރިސުން ދައްކާނީ ކިޔަވާނެ މަގުތަކެވެ. ކިޔަވާނީ ކުދިން އަމިއްލައަށް އިންޓަރނެޓްގެ ޒަރީއާއިންނެވެ. މިއަދުގެ ކްލާސްރޫމުތައް ވަނީ ވިއުގަތަކުން ގުޅާލެވިފައެވެ. މޫސުން ގޯސްވުމުގެ ސަބަބުން ސްކޫލަށް ހާޒިރު ނުވެވުނަސް ކްލާހުގެ ވަގުތުގައި ދަރިވަރުން ކްލާސްތަކަށް ހާޒިރުވަނީ ގޭގައި ތިބެގެންނެވެ. އިންޓަނެޓާއި ލޯކަލް ވިއުގަ ތަކުގެ ޒަރީއާއިންނެވެ. 

ސްމާރޓްބޯރޑު

ޒަމާނުއްސުރެ ބޭނުންކުރަމުން އައި ޗޯކުބޯޑުތައް ދޫކޮށްލުމަށްފަހު މިހާރު އެމެރިކާގައި މައިގަނޑު ގޮތެއްގައި ބޭނުން ކުރެވެނީ ސްމާރޓްބޯޑެވެ. އެމެރިކާގައި ސްމާރޓްބޯޑު ބޭނުންކުރާ ކްލާސްރޫމުތަކުގެ ޢަދަދު 2 މިލިޔަނަށްވުރެ އިތުރެވެ. ސްމާރޓްބޯޑަކީ ޗޯކްބޯޑު ލިޔާފަދައިން، ޚާއްޞަ ގަލަމަކުން އޭގައި ލިޔެ، ކުރަހައި ހެދޭ އެއްޗެކެވެ. ސްމާރޓްބޯޑަށް ޚާއްޞަ ސޮފްޓްވެއަރއިން ސްކްރީނުން ދައްކާ ތަކެތި ތްރީޑީކޮށް އަނބުރާލެވެއެވެ. މިސާލަކަށް ކޮޑި ކިޔަވަދޭއިރު، ކޮޑިއެއް އަތުގައި ބައިންދައިގެން ދައްކާލާ، ގޮތްގޮތަށް އަނބުރާލެވޭ ގޮތަށް، ސްމާރޓްބޯޑުގެ ސްކްރީނުގައި ހުންނަ ކުރެހުމުގައި "ހިފައި" އަނބުރާ ހެދެއެވެ. 

ކޮމްޕިޔުޓަރ 

ކޮމްޕިޔުޓަރަކީ އިންޓަރނެޓްގެ ޒަރީޢާއިން މަޢުލޫމާތު ހޯދުމަށް ބޭނުންކުރެވޭ އެންމެ މުހިންމު އެއް ވަޞީލަތެވެ. މުދައްރިސުން ފިލާވަޅު ތައްޔާރުކުރުމަށާއި ދަރިވަރުން ފިލާވަޅު ދަސްކުރުމަށާއި އަދި މުދައްރިސުންނާއި ކިޔަވާކުދިންގެ މެދުގައި ގުޅުން ބަދަހިކުރުމަށް އެޅިފައިވާ ފާލަމެކެވެ. އިންޓަރނެޓް ބޭނުންކުރެވޭ ކޮމްޕިޔުޓަރުގެ ވަޞީލަތްތަކުގެ ތެރޭގައި ޕީސީ އާއި ލެޕްޓޮޕާއި ޓެބްލެޓާއި ސްމާޓް ފޯނުވެސް ހިމެނެއެވެ. 

އެހެނިހެން މަލްޓިމީޑިއާ

ކޮމްޕިޔުޓަރު ފަދަ އާލަތްތަކުގެ އިތުރުން މަލްޓި މީޑިއާގެ ގޮތުގައި ޑިޖިޓަލް ޓީވީ ޗެނަލުތަކާއި ޑީވީޑީ ފަދަ ވަޞީލަތްތައް ޒަމނީ ކުލާސް ރޫމްތަކުގައި މިއަދު ބޭނުންކުރެވެއެވެ. އެކިއެކި މާއްދާތަކާ ގުޅޭ ތަފާތު ޗެނަލުތަކުން ދަރިވަރުންނަށް އަބަދުވެސް މަޢުލޫމާތު ލިބިލިބި ހުންނަގޮތްހެދިފައި ހުރުމުން ކިޔަވާކުދިންގެ ތަޢުލީމީ ފެންވަރު މަތިވެގެންދެއެވެ.

ސޯޝަލް މީޑިއާ

ޓްވިޓަރ، ވައިބަރ، ގޫގްލް ހޭންގްއައުޓްސް، ގޫގްލް ޕްލަސް އަދި ފޭސްބުކް ފަދަ ޒަމާނީ ވަޞީލަތްތައް ބޭނުންކޮށްގެން ދަރިވަރުންގެ ޚިޔާލުތަކާއި ސުވާލުތައް ކުލާހުގެ ސްމާޓްސްކްރީންގައި އެންމެންނަށް ފެންނަ ގޮތަށް ހަދައިލުމުން މުދައްރިސުގެ ޖަވާބާއި އިޖާބަތައް ކިޔަވާކުދިންނަށް ދަރިވަރުންގެ ޑިޖިޓަލް ޑިވައިސްތަކުން ވަގުތުން ފެނިގެންދާނެއެވެ. މުހިންމު އިޢުލާންތަކާއި އެންގުންތަކާއި ގުރޫޕު މަސައްކަތްތަކާއި ފިލާވަޅުގެ ނޯޓުތަކާއި އެހެނިހެން ލިޔެކިޔުންތައް ވަގުތުން ވަގުތުން ޙިއްޞާކޮށްލެވޭނެއެވެ. 

ކްލައުޑް ސްޓޯރިޖް 

ޑްރޮޕްބޮކްސް، ގޫގްލް ޑްރައިވް، އަދި ވަންޑްރައިވް ފަދަ އޮންލައިން ފައިލް ހޮސްޓިންގ ޚިދުމަތްތައް ބޭނުންކޮށްގެން ހޯމްވާރކާއި އެހެނިހެން އެސައިންމަންޓްތައް ކަރުދާހުގައި ޕްރިންޓް ނުކޮށް ވަގުތުން އޮންލައިން ކޮށް ސަބްމިޓްކުރެވެއެވެ. އަދި ދަރިވަރުންގެ ނަތީޖާތައް ވަގުތުން ޝާއިޢުކުރެވި ފެންވަރު ވަޒަންކުރުމުގެ ފުރުޞަތު ހަމަ ވަގުތުން ލިބިގެންދެއެވެ. މި ވަޞީލަތްތަކުގެ ސަބަބުން ފޮތް ދަބަސް އުފުލުން ފަދަ ބުރަ މަސައްކަތުން ކުދިން ސަލާމަތް ކުރެވޭނެއެވެ. އަދި ދުނިޔޭގެ ކޮންމެ ތަނެއްގައި ހުރެގެންވެސް އިންޓަރނެޓު ލިބޭނަމަ މި ވަޞީލަތްތަކުގެ ބޭނުން ހިފޭނެއެވެ.

އޮންލައިން ކުލާސްރޫމް 

ޔޫޓިޔުބް، ގޫގްލް ހޭންގްއައުޓްސް، އޮންލައިން ޕްލެޓްފޯމް އަދި ސްކައިޕް ފަދަ ވަޞީލަތްތަކަކީ، ކުލާހަށް ނުދެވޭ ފަދަ ދަނޑިވަޅުތަކުގައި ކިޔަވައިދިނުމަށް ބޭނުންކުރެވިދާނެ ވަޞީލަތެކެވެ. މުދައްރިސުންނަށް ގޭގައި ތިބެގެން ކުލާސް ނަގައިދެވޭނެއެވެ. އަދި ދަރިވަރުންނަށް ވެސް ގޭގައި ތިބެގެން ކުލާހުގައި ބައިވެރިވެވޭނެއެވެ. މޫސުމަށް އަންނަ ބަދަލަކުން ނުވަތަ ޤުދުރަތީ ކާރިސާއެއްގެ ސަބަބުން ދިމާވާ ކަމެއްގެ ސަބަބުން ފިލާވަޅަށް ހުރަސްއެޅިގެން ދިއުމުގެ ފުރުޞަތު މި ގޮތުން ކުޑަވާނެއެވެ. 

ކުލާސް ވެބްސައިޓް 

ކުލާހުގެ ވެބްސައިޓެއް ނުވަތަ "ވިކީ" އެއް ނޫންނަމަ ގޫގްލް ކްލާސްރޫމް ފަދަ ވަޞީލަތެއް ބޭނުންކުރުމުން ކުލާހުގައި ހިނގާ ކަންތައްތައް ދުވަހުން ދުވަހަށް އެއް ތަނަކުން އަބަދުވެސް ފެންނަންހުންނާނެއެވެ. މިއީ ކުލާހުގެ ވީޑިއޯތަކާއި ތާވަލުތަކާއި އެސައިންމަންޓުތަކާއި ފިލާވަޅުތަކާއި ކަލަންޑަރު ފަދަ އެންމެހައި މަޢުލޫމާތުތައް އޮންލައިން ކޮށް ޙިއްޞާކުރެވިގެންދާނެ "ޕޯޓަލް" އެއް ނުވަތަ ދޮރޯއްޓެކެވެ.

ނިންމުން

މަތީގައި ބަޔާން ކުރެވުނު ތަކެއްޗަކީ ދުނިޔޭގެ ތަރައްޤީ ވެފައިވާ ޤައުމުތަކުގައި ވަރަށް ފުޅާދާއިރާއެއްގައި މިހާރު ބޭނުންކުރެވެމުންދާ އާލާތްތަކާއި ވަޞީލަތްތަކެކެވެ. އަޅުގަނޑުމެންގެ ކުލާސްރޫމްތައްވެސް މިފަދަ ޓެކްނޮލޮޖީގެ އާ ބާވަތްތަކުން މުއްސަނދިކޮށް އެތަކެތީގެ ބޭނުން އެންމެ ހެޔޮގޮތުގައި ބޭނުން ކުރެވިއްޖެ ނަމަ ދަރިވަރުންގެ ތަޢުލީމަށް ވަރަށް ބޮޑު ކުރިއެރުމެއް ލިބިގެން ދާނެއެވެ.

ޒަމާނީ ވަޞީލަތްތަކުން މުއްސަނދި ވެފައިވާ ކުލާސްތަކުގައި ކުދިން ކިޔަވަމުންދަނީ މުދައްރިސްގެ ބެލެހެއްޓުމުގެ ދަށުން އެކުދިން އަމިއްލައަށެވެ. މީގެ ނަތީޖާއެއްގެ ގޮތުން ތަޢުލީމް ޙާޞިލު ކުރުމުގައި ދަރިވަރުންގެ ޒިންމާ ދަރިވަރުންނަށް ވިސްނި އަމިއްލައަށް ޒިންމާނަގައެވެ. ނަތީޖާއެއްގެ ގޮތުން މިފަދަ ދަރިވަރުންގެ ވިސްނުމުގެ ހުނަރާއި ކަންކަމަށް އަމިއްލައަށް ކުރިމަތިލައި ކަންކަން ކުރުމުގެ ޤާބިލުކަން އިތުރުވެއެވެ.

ޒަމާނީ ޓެކްނޮލޮޖީގެ ވަޞީލަތްތައް މަދު ނަމަވެސް، މިއަދު އަޅުގަނޑުމެންގެ ތަޢުލީމީ ނިޒާމުވެސް ބައްޓަން ކުރެވެމުން މިދަނީ މިދެންނެވި ގޮތަށެވެ. މުދައްރިސްގެ އިރުޝާއިއެކު ކުދީން އަމިއްލައަށް ޒިންމާ ނަގައިގެން ކިޔަވާ ގޮތަށެވެ. 

އެހެންކަމުން ކުރިއަށް އޮތްތަނުގައި މިޤައުމުގެ ތަޢުލީމީ ނިޒާމުވެސް ހަރުދަނާ ވެގެން ދާނެކަމަށް އުންމީދުކުރެވެއެވެ.

ރެފަރަންސް

http://www.cest.org.uk/importance-of-technology-in-schools

http://www.teachhub.com/technology-classroom-school-future

https://en.wikipedia.org/wiki/Educational_technology